Ourense acolle os días 22 e 23 de xaneiro a feira profesional Funergal que nesta edición incrementou nun 30% a superficie ocupada polos expositores que, á súa vez, tamén se incrementaron nun 15% no punto de encontro do sector funerario.

Ourense é o punto de encontro do sector funerario de toda a península grazas á celebración da sexta edición de Funergal, unha feira profesional de carácter monográfico, que se está consolidando como un referente para empresarios do sector tanto en España coma en Portugal. Durante o acto de inauguración celebrado esta mañá, a directora xeral de Comercio, Nava Castro Domínguez, incidiu na importancia de Funergal como a única cita monográfica do sector funerario para o ano 2010, así como no papel desta cita como unha vía de introdución das empresas galegas no mercado portugués, posto que en Portugal non existe ningunha feira especializada no sector.

Funergal, Feira de produtos e servizos funerarios, é unha das dúas citas do sector funerario celebradas en España e unha das cinco que se celebran en Europa. O seu obxectivo é fomentar o negocio, a competitividade e a actualización do sector funerario, ofrecerá unha ampla gama de produtos e de servizos, ao tempo que acollerá a celebración dunhas Xornadas Técnicas e mesmo unha entrega de premios organizados por un portal de internet especializado no sector.

Na edición deste ano, a feira conta cunha superficie de 6.000 metros cadrados, un 30% con respecto á edición anterior, e coa participación de 75 expositores, o que supón tamén un incremento do 15%. Entre os sectores representados hai 17 empresas de fabricación de ataúdes, unha área de negocio en constante crecemento e de grande relevancia e tradición na provincia de Ourense; haberá espazo para compañías de fabricación de vehículos funerarios, fabricantes de furnas e de lápidas, tanatorios, florerías ou encadernadores.

A actividade comercial de Funergal, que estará aberto aos profesionais no recinto feiral de Expourense en horario de 11:00 a 20:00 horas, complementarase coa celebración dunhas Xornadas Técnicas nas que se tratarán amplamente diversos temas relacionados coa evolución do sector funerario. As actividades centraranse na análise da situación do sector, en cuestións coma o marketing funerario, a xestión de cemiterios municipais ou a incorporación de internet aos servizos mortuorios. O sábado haberá unha sesión dedicada á tanatopraxia, na que se abordarán a homologación como nova profesión recoñecida, os cambios na lexislación, as necesidades formativas ou a introdución da muller no sector funerario.